ເພື່ອພັດທະນາວຽກປະກັນສຸຂະພາບໃຫ້ທຸກຄົນສາມາດເຂົ້າເຖິງການບໍລິການປິ່ນປົວສຸຂະພາບ ລວມທັງການສົ່ງເສີມ, ການປ້ອງກັນ, ການຮັກສາ, ການຟື້ນຟູ, ການດູແລທີ່ມີຄຸນນະພາບດີ ແລະ ການເຂົ້າເຖິງການບໍລິການປິ່ນປົວ ທີ່ບໍ່ມີຜົນ ກະທົບໃນການສ້າງຄວາມຫຍຸ້ງຍາກດ້ານການເງິນໃຫ້ກັບບຸກຄົນ. ສ້າງຄວາມເຂັ້ມແຂງການພັດທະນາວຽກປະກັນສຸຂະພາບ ເພື່ອໃຫ້ເປັນລະບົບ ແລະ ມີປະສິດທິພາບ ໃຫ້ທຸກຄົນ ສາມາດເຂົ້າເຖິງການບໍລິການປິ່ນປົວສຸຂະພາບ
- ສ້າງ ແລະ ປັບປຸງນິຕິກຳກ່ຽວກັບວຽກປະກັນສຸຂະພາບ ໃຫ້ມີເນື້ອໃນເລິກເຊິ່ງ ແລະ ຄົບຖ້ວນ ເພື່ອແກ້ໄຂສິ່ງ ທ້າທາຍ ແລະ ຊ່ອງຫວ່າງທີ່ສົ່ງຜົນໃຫ້ຍັງມີຄວາມຈຳກັດໃນການຂະຫຍາຍວຽກປະກັນສຸຂະພາບແຫ່ງຊາດ ສໍາລັບທຸກຄົນ;
- ເຜີຍແຜ່, ສ້າງຄວາມເຂົ້າໃຈ, ຈັດຕັ້ງປະຕິບັດ ແລະ ບັງຄັບໃຊ້ກົດໝາຍ ແລະ ນິຕິກຳ ທີ່ກ່ຽວຂ້ອງ;
- ທົບທວນຄືນບັນດາອຸດໜູນປະກັນສຸຂະພາບ ໂດຍມີຈຸດປະສົງເພື່ອຮັບປະກັນໃຫ້ການອຸດໜູນພຽງພໍ ແລະ ສາມາດປົກປ້ອງດ້ານການເງິນໄດ້.
- ສ້າງຄວາມເຂັ້ມແຂງໃຫ້ຫ້ອງການກອງທຶນປະກັນສຸຂະພາບແຫ່ງຊາດໃນທຸກຂັ້ນ;
- ພັດທະນາລະບົບການບໍລິຫານກອງທຶນປະກັນສຸຂະພາບແຫ່ງຊາດໃຫ້ມີຄວາມພຽງພໍ ແລະ ມີຄວາມຍືນຍົງ;
- ພັດທະນາ ແລະ ຈັດຕັ້ງປະຕິບັດລະບົບການຕິດຕາມ ແລະ ຂໍ້ມູນຂ່າວສານໃຫ້ມີຄວາມປະສົມປະສານດີຂຶ້ນ;
- ຄົ້ນຄ້ວາ ແລະ ຖອດຖອນບົດຮຽນທີ່ດີຈາກຕ່າງປະເທດ ແລະ ສາກົນ.
- ກຳນົດ ແລະ ຈັດຕັ້ງປະຕິບັດມາດຕະຖານຄຸນນະພາບຂັ້ນພື້ນຖານໃນການໃຫ້ບໍລິການປິ່ນປົວສຸຂະພາບ ໂດຍ ສຸມໃສ່ອັດຕາມສ່ວນແພດໝໍຕໍ່ຈໍານວນປະຊາກອນ, ການສະໜອງການບໍລິການ ແລະ ຄຸນນະພາບຂອງ ສະຖານທີ່ການບໍລິການ, ອຸປະກອນການແພດ ແລະ ຢາປິ່ນປົວພະຍາດ;
- ປັບປຸງ ແລະ ຄວບຄຸມການປະຕິບັດຕາມຄູ່ມືການປິ່ນປົວແຫ່ງຊາດ;
- ປັບປຸງຄຸນນະພາບຂອງສະຖານທີ່ໃຫ້ການບໍລິການປິ່ນປົວສຸຂະພາບ, ເພີ່ມຈໍານວນແພດໝໍ ແລະ ຮັບປະກັນ ໃຫ້ສະຖານທີ່ປິ່ນປົວສຸຂະພາບມີຢາທີ່ຈຳເປັນ ແລະ ເຄື່ອງມືການແພດທີ່ຈໍາເປັນພຽງພໍ.
- ຂະຫຍາຍສະຖານທີ່ ແລະ ການເຂົ້າເຖິງການປິ່ນປົວສຸຂະພາບ, ອຸປະກອນການແພດ, ແພດໝໍ ແລະ ຢາ ປິ່ນປົວສຸຂະພາບທີ່ຈຳເປັນໃນເຂດຊົນນະບົດທີ່ທຸກຍາກຫ່າງໄກສອກຫຼີກ;
- ຂະຫຍາຍການປົກຄຸມການປະກັນສຸຂະພາບໃຫ້ປະຊາຊົນ ທີີ່ທຸກຍາກໃນຊົນນະບົດ ໂດຍອອກບັດຢັ້ງຢືນການປະກັນສຸຂະພາບ ແລະໃຫ້ການບໍລິການປິີ່ນປົວສຸຂະພາບ ຢ່າງທົີ່ວເຖິງ.
- ສະເໜີການຈັດສັນງົບປະມານລັດ ເພື່ອເປັນທຶນສົມທົບ ແລະ ເກັບແຫຼ່ງເງິນສົມທົບຈາກຜູ້ປະກັນຕົນໃຫ້ພຽງພໍກັບການຈັດຕັ້ງປະຕິບັດວຽກປະກັນສຸຂະພາບ;
- ລະດົມແຫຼ່ງທຶນຈາກຕ່າງປະເທດ ແລະ ອົງການຈັດຕັ້ງສາກົນຕ່າງໆ ເພື່ອຮັບປະກັນໃນການໃຫ້ບໍລິການປິ່ນປົວສຸຂະພາບສໍາລັບຜູ້ທຸກຍາກ.
ພາກສ່ວນຮັບຜິດຊອບຫຼັກ: ກະຊວງສາທາລະນະສຸກ, ກະຊວງແຮງງານ ແລະ ສະຫວັດດີການສັງຄົມ, ກະຊວງການເງິນ, ກະຊວງແຜນການ ແລະ ການລົງທຶນ, ກະຊວງພາຍໃນ ແລະ ອົງການປົກຄອງທ້ອງຖິ່ນ.
ກອງທຶນປະກັນສຸຂະພາບແຫ່ງຊາດ
ກອງທຶນປະກັນສຸຂະພາບແຫ່ງຊາດ ຫຼື ກປຊ ແມ່ນນະໂຍບາຍຂອງລັດຖະບານເພື່ອຊ່ວຍເຫຼືອ ປະຊາຊົນໄດ້ປິ່ນປົວເວລາເຈັບເປັນ ແລະ ກອງທຶນເພື່ອຊ່ວຍເຫຼືອປະຊາຊົນ ເວລາໄປປິ່ນປົວຢູ່ສຸກສາລາ ແລະ ໂຮງໝໍຂອງລັດ.
ຜູ້ໃດສາມາດໃຊ້ສິດໄດ້
ເງື່ອນໄຂໄດ້ສິດປິ່ນປົວ
1. ເອກະສານຢັ້ງຢືນສິດປິ່ນປົວ
- ບັດປະຈໍາຕົວ, ບັດປະກັນສັງຄົມ, ໃບຢັ້ງຢືນຈາກນາຍບ້ານ, ເອກະສານໂຮງໝໍອອກໃຫ້ ຫຼື ອື່ນໆ…
2. ຈ່າຍເງິນສົມທົບ
- ສຸກສາລາ (ກວດເຂດນອກ+ນອນປິ່ນປົວ): 5,000 ກີບ/ຄັ້ງ
- ໂຮງໝໍເມືອງ (ກວດເຂດນອກ): 10,000 ກີບ/ຄັ້ງ
- ໂຮງໝໍແຂວງ (ກວດເຂດນອກ): 15,000 ກີບ/ຄັ້ງ
- ໂຮງໝໍ/ເມືອງ/ແຂວງ (ນອນປິ່ນປົວ): 30,000 ກີບ/ຄັ້ງ
ກໍລະນີ ຄົນເຈັບໄດ້ຈ່າຍເງິນຕອນກວດເຂດນອກ ແລ້ວຖືກສົ່ງເຂົ້ານອນໃຫ້ຈ່າຍເພີ່ມໃຫ້ຄົບ 30,000 ກີບ
ຜົນປະໂຫຍດທີ່ຈະໄດ້ຮັບ
- ໄດ້ຮັບບໍລິການທຸກຢ່າງ, ລວມທັງການປິ່ນປົວທີ່ມີ ລາຄາສູງ ແລະ ພະຍາດຊຳເຮື້ອ ທີ່ມີໃນໂຮງໝໍ ຂອງລັດ
- ໄດ້ຮັບຄ່າອາຫານ ແລະ ຄ່າເດີນທາງ ສໍາລັບ ຜູ້ທຸກຍາກເຂົ້ານອນໂຮງໝໍ
ຜົນປະໂຫຍດທີ່ ກປຊ ບໍ່ປົກຄຸມ ເມື່ອ:
- ຜູ້ອື່ນຈ່າຍໃຫ້ແລ້ວເຊັ່ນ: ຄູ່ກໍລະນີ, ໂຄງການຊ່ວຍເຫຼືອ ແລະ ປະກັນໄພອື່ນໆ
- ກ່ຽວກັບເລື່ອງສ່ວນຕົວ: ເຮັດໝັນ, ທໍາຮ້າຍຕົວເອງ ແລະ ຜູ້ອື່ນ, ໃສ່ແຂ້ວທຽມ, ຕັດແວ່ນຕາ, ເສີມຄວາມງາມ, ກວດສຸຂະພາບປະຈຳປີ
- ໄປບໍລິການຢູ່ສະຖານບໍລິການເອກະຊົນ: ໂຮງໝໍເອກະຊົນ, ຄລີນິກ, ຮ້ານຂາຍຢາ…
ສະຖານທີ່ໃຫ້ບໍລິການ
- ສຸກສາລາ
- ໂຮງໝໍເມືອງ
- ໂຮງໝໍແຂວງ